Gimgim de ameyo dinya. Hetanî lîse Gimgim de wendo. Unîversîteyê Duzce de qeydê xo viraşta labelê seba ke wezîfeyê xo yê eskerîye nêardo ca heqê wendişî dest ra ameyo girewtene. Serra 2009 de ÎHD yê Îstanbulî de duştê mîlîtarîzm û mecburîya leşkerîye de Redê xo yê Wijdanî eşkera kerd. Gama ke dezgeyê UNESCOyî derheqê rewşa vindîbîyayîşê lehçeya zazakî/kirmackî de rapor vila keno, o zî keweno binê tesîrê nê raporî, Enstîtuya Kurdî ya Îstanbulî û Weşanxaneyê Vateyî de verî derse cêno, dima o bi xo dersa ziwanî dano.
Hîkaya ey a bi sernameyê “Xêx”î 2009 de Musabeqaya hîkaye û şîîran a des û hewtine ya Huseyîn Çelebî de xelata dîyine girewte. Dima, musabeqaya fiqrayan ke keyepelê Zazakî.Netî organîze kerde, fiqraya ey a bi sernameyê “Şima Teskere Nêdanê, Dewlete Dana” xelata juyîne/ ewine girewte. Reyna, 2010 de, musabeqaya hîkayan a Abdullah Duranî de hîkaya ey “Mar” xelata mansîyonî cêna û musabeqaya hîkaye û şîîran a des û heştine ya Huseyîn Çelebî de zî şîîra ey “Xatir” xelata juyîne/yewine girewte. Û reyna hîkayeya ci ya bi nameyê “Raywan” ‘Xelata Kovara Vateyî, Musabeqaya Hîkaye û Şîîranê Kirmanckî (Zazakî)’ de beşê hîkayeyan de xelata dîyine girete. Çîçek, endamê jurî yê Xelata Edebîyatî ya Huseyîn Çelebî, Festîvala Huner û Kulturî ya Yilmaz Guneyî ya Mîyanneteweyî bi. Şîîre, nuşte û hîkayeyê ey Toplum ve Kuram Dergisi, Kovara Vate, Kovara Şewçila, Tîroj, Kovara W, Kovara Zend û rojnameya Newepelî û Welat Verrojî de weşanîyayî.
Alî Aydin Çîçek 2019 ra nata Ewropa de ciwîyeno.